Israel kuwaachia raia wa kigeni, waliokamatwa ndani ya meli.

Jerusalem:

Israel imesema itawaachia raia wote wa kigeni, ambao walikamatwa na jeshi la nchi hiyo siku mbili zilizopita katika shambulio la umwagaji damu lililofanywa dhidi ya meli iliyobeba misaada kuelekea Gaza.

Israel imechukua uamuzi huo kutokana na matakwa ya viongozi duniani, ambao pia wametaka kufanyika kwa uchunguzi juu ya shambulio hilo la Jumatatu, ambao ulisababisha vifo vya wanaharakati tisa.

Katika mkutano uliofanyika mjini New York Marekani, wanachama wengi wa Baraza la Usalama la Umoja wa Mataifa waliilaani Israel na kuitaka nchi hiyo kuondoa vizuizi ilivyoweka Gaza.

Msafara huo mdogo wa meli, ulikuwa umeandaliwa kwa pamoja na kundi linalowaunga mkono Wapalestina pamoja na Shirika la Haki za Binadamu la Uturuki.

Uturuki imesema watu wanne miongoni mwa watu tisa waliouawa, ni raia wake na kuliita tukio hilo kama ugaidi wa kitaifa.

Wakati huo huo Serikali ya Israel imesema imewaachia kutoka gerezani ilikokuwa ikiwashikilia wanaharakati wapatao 50 wa Uturuki waliokuwa katika meli hiyo iliyobeba msaada  na kwamba watarudishwa kwao.

Waziri mkuu wa Japan atangaza kujiuzulu: Tokyo

Waziri Mkuu wa Japan Yukio Hatoyama ametangaza kuwa atajiuzulu nafasi hiyo ya uwaziri mkuu, baada ya miezi isiyozidi tisa tangu kushika wadhfa huo.

Hatoyama amekuwa katika shinikizo kutoka katika chama chake kumtaka ajiuzulu kuelekea katika uchaguzi wa bunge unaotarajiwa kufanyika nchini humo mwezi Julai.

Habari zinasema kuwa kutokana na kutotimiza ahadi yake ya wakati wa kampeni, kuhamisha kituo cha jeshi la Marekani katika kisiwa cha nchi hiyo cha Okinawa inafikiriwa kuwa ni sababu kubwa moja wapo ya kumuangusha kisiasa Waziri Mkuu huyo wa Japan.

Deutsche Welle