Viongozi wawili wakamatwa Kenya

Mwathirika wa mlipuko abebwa hospitali ya Kenyatta,Nairobi.

Polisi nchini Kenya wamemkamata naibu waziri na mbunge mmoja kwa kutoa kauli za chuki katika kampeni ya katiba mpya, baada ya tukio la Jumapili ambapo watu sita walifariki dunia baada ya mlipuko wa guruneti mjini Nairobi.

Naibu waziri wa Barabara Wilfred Machage na Fred Kapondi ni miongoni mwa wabunge sita, akiwemo waziri wa Elimu ya Juu William Ruto, anayeshutumia kwa kutoa kauli hizo.

Wote sita wamekana kuhusika na madai hayo.

Watu hao walikufa baada ya kushambuliwa na guruneti katika mhadhara wa kidini kwenye mji mkuu, Nairobi, iliyoandaliwa na upande wanaopinga katiba wanaojulikana kama "No".

Viongozi wa dini wameishutumu serikali, inayopinga kampeni ya kuunga mkono katiba mpya wajulikanao kama "Yes", kwa kuhusika na mashambulio hayo.

Mwandishi wa BBC, Will Ross mjini Nairobi amesema, Wakenya wengi wanatilia wasiwasi madai ya viongozi hao wa kanisa ya kuwa serikali inahusika na mlipuko wa Jumapili, hasa inavyoonekana kuwa wengi tayari wanaonekana kuiunga mkono kampeni ya "Yes".

'Kusimamisha kampeni'

Siku ya Jumatatu waziri mkuu Raila Odinga alisema shambulio hilo lilikuwa linafanyiwa uchunguzi na kutoa wito wa kuacha kushuku nani kahusika mpaka uchunguzi utakapokamilika.

Wabunge wengine watano wanaoshutumiwa kutoa kauli za chuki wanatarajiwa kujibu mashtaka hayo mbele ya tume ya taifa ya mshikamano na uadilifu (NCIC) siku ya Jumanne.

Kulingana na ripoti kutoka gazeti la Daily Nation, tume hiyo pia imemwandikia Rais Mwai Kibaki na Bw Odinga, wakiomba kusimamishwa kwa kampeni zote za katiba, kabla ya kufanyika kwa kura ya maoni iliyopangwa kufanyika Agosti.

Baadhi wanahofia kurejea kwa ghasia zilizotokea baada ya uchaguzi wa Desemba 2007, iliyosababisha vifo vya takriban watu 1,300 na 300,000 wakibaki bila makazi.

Ghasia hizo zilichochewa zaidi na ugomvi wa ardhi baina ya makabila yanayopingana na rasimu hiyo ya katiba inatarajia kuunda tume ya kushughulikia masuala ya ardhi ya umma na inayomilikiwa na jamii, ambayo nayo imepingwa na baadhi ya watu.

Vurugu hizo zilimalizika baada ya wapinzani wa uchaguzi huo Bw Kibaki na Bw Odinga kukubali kugawana madaraka na kuandika katiba mpya.

Ruto kujibu madai ya kueneza chuki

majeruhi katik ahospitali Kenyatta

Waziri mmoja nchini Kenya ameamrishwa kufika mbele ya kamati maalum inayosimamia utangamano wa kitaifa kujibu madai ya kueneza chuki katika kampeni zinazoendelea kuhusu katiba mpya inayopendekezwa.

Waziri huyo William Ruto amekuwa akiongoza kampeni za kupinga katiba hiyo inayopendekezwa.
Kamati hiyo imeelezea wasiwasi kuwa wanasiasa wanatumia kampeni kuhusu katiba hiyo kueneza chuki.

waziri william ruto

Wasiwasi umeongezeka zaidi baada ya watu 5 kufa na zaidi ya 75 kujeruhiwa baada ya milipuko kutokea katika mkutano wa hadhara siku ya Jumapili. Tangu kutokea milipuko hiyo kumekuwa na visa vya kulaumiana kati ya wanasiasa na viongozi wa kidini na bado haijulikani ni nani aliyehusika na milipuko. Polisi wameanzisha uchunguzi.

Waziri wa fedha atoa ahadi ya mabadiliko-Nigeria

Waasi nchini Nigeria

Waziri mpya wa Fedha wa Nigeria, Dkt. Olusegun Aganga, ameiambaia BBC kuwa taifa hilo linapaswa kuimarisha uchumi wake ili isitegemea mapato ya mafuta pekee.

Dkt. Aganga amesema kuwepo kwa mafuta nchini Nigeria kulikuwa baraka, lakini sasa imegeuka na kuwa laana.
Nigeria ndio nchi ya kumi duniani kwa uzalishaji wa mafuta, lakini eneo la Niger Delta ambalo lina utajiri mkubwa wa rasilimali hiyo imekubwa na mapigano ya wenyewe kwa wenyewe kati ya makundi kadhaa ya waasi.
Waasi hao wanadai kuwa eneo lao linatoa kiasi kikubwa cha mapato ya serikali lakini wao hawapati chochote kutokana na mauzo ya mafuta hayo.
Secta zingine za uchumi kama vile kilimo na viwanda zimeshindwa kuimarika kwa sababu serikali ya nchi hiyo inashughulikia kwa hali na mali secta ya mafuta pekee.
Bwana Aganga amesema atajirbu kuimarisha secta ya kawi na pia kuhimiza uwekezaji katika secta ya kilimo.

BBC SWAHILI