FIFA yasifu usimamizi mzuri wa Afrika Kusini na kuionya Ufaransa

Shirikisho la Soka Duniani FIFA limeisifu Afrika Kusini kwa usimamizi mzuri wa Kombe la Dunia huku duru ya pili ya mashindano hayo ikianza.

Katibu Mkuu wa FIFA Jerome Valcke amesema Afrika Kusini imefanikiwa kukabiliana na changamoto za kuandaa Kombe la Dunia na kuongeza kuwa hakuna tatizo lololote la kimsingi lililoshuhudiwa hadi sasa. Valcke amesema kama mambo yataendelea ilivyo hivi sasa basi Afrika Kusini itakuwa kati ya nchi zitakazopewa fursa ya kuandaa Kombe la Dunia siku za usoni iwapo nchi iliyoteuliwa kuandaa michuano ya kombe hilo itashindwa kufanya hivyo. Wakati huo huo FIFA imeionya vikali serikali ya Ufaransa kuwa isijaribu kuingiza masuala ya siasa katika usimamizi wa soka nchini humo. Onyo hilo la FIFA linafuatia matamshi yaliyotolewa hivi karibuni na Rais Sarkozy wa Ufaransa baada ya timu ya taifa ya nchi hiyo kuondolewa mapema katika mashindano ya kombe la dunia. Katibu Mkuu wa FIFA amesema serikali ya Ufaransa haina haki ya kumtaka mkuu wa shirikisho la soka nchini humo Jean-Pierre Escalletes ajiuzulu. Timu ya taifa ya Ufaransa iko chini ya mashinikizo makali ya kisiasa kufuatia fedheha ya kuondolewa mapema katika Kombe la Dunia.