Ethiopia yasema imefikia makubaliano ya amani na waasi Ogaden

 

Serikali ya Ethiopia imedai kuwa mrengo mmoja wa waasi wa eneo la Ogaden umekubali mapatano ya amani lakini kundi hilo la waasi limekanusha kuwepo mapatano yoyote.

Harakati ya Ukombozi wa Ogaden ONLF inapigania kujitenga eneo la Ogaden ambalo lina watu wenye asili ya Somalia.

Abay Tsehaye mshauri wa usalama wa taifa wa Waziri Mkuu wa Ethiopia Meles Zenawi amedai kuwa Juni 12 kulifanyika mkutano nchini Ujerumani kati ya wawakilishi wa serikali na wawakilishi wa mrengo wa ONLF unaoongozwa na Selahadin Mao. Amesema mrengo huo unaodhibiti nusu ya wapiganaji wa ONLF umesema utaheshimu katiba. Hatahivyo kundi hilo la waasi limetoa taarifa na kukanusha kuwepo makubaliano hayo. Eneo la Ogaden lina utajiri mkubwa wa mafuta na waasi wamekuwa wakihujumu mashirika ya kimataifa yanayochimba mafuta na gesi katika eneo hilo.

                *********************************

Mkutano wa G20 waanza Canada

Nembo ya mkutano wa kundi la G-20 uliofunguliwa rasmi mjini Toronto, Canada.

Viongozi wa kundi la nchi zilizoendelea kiviwanda na zile zinazoinukia kiuchumi-G-20 wameanza mkutano wao wa kilele mjini Toronto, Canada

TORONTO

Viongozi wa kundi la nchi zilizoendelea kiviwanda na zinazoinukia kiuchumi- G-20 wameanza mkutano wao wa kilele mjini Toronto. Viongozi hao wa mataifa hayo 20 walilakiwa na mwenyeji wao Waziri Mkuu wa Canada, Stephen Harper. Canada pia ilikuwa mwenyeji wa mkutano uliomalizika kwa kundi la nchi nane tajiri duniani- G-8. Katika mkutano huo wa siku mbili, viongozi hao watajadili mkakati wa kuongeza nguvu harakati za kufufua uchumi pamoja na mpango tata wa kuyadhibiti masoko ya fedha. Kundi hilo la G-20 ni kundi jipya, ambalo mkutano wake wa kwanza ulifanyika  mjini  Pittsburg, Pennsylvania na linayaleta pamoja mataifa manane tajiri duniani, pamoja na nchi zinazoinukia kiuchumi kama vile Australia, Brazil, China na India. Nchi nane tajiri kiviwanda, Uingereza, Canada, Ufaransa, Ujerumani, Japan, Itali, Urusi na Marekani  zilimaliza mkutano wao wa siku mbili jana, kwa kuahidi dola bilioni 7.3 katika miaka mitano ijayo, kupambana na vifo vya watoto walio chini ya umri wa miaka mitano. Mkutano huo pia uligusia masuala ya usalama, ikiwemo Iran, Korea Kaskazini, Afghanistan, Pakistan na Mashariki ya Kati.