Mkurugenzi Asomewa Shtaka La Mauaji
Mkurugenzi wa Hoteli ya Kitalii ya South Beach ya jijini Dar es Salaam, Salim Nathoo maarufu kwa jina la Chipata (53), amepandishwa kizimbani akikabiliwa na kesi ya mauaji ya kumchoma moto kijana aliyeingia kwenye hoteli yake bila kibali.
Nathoo, mkazi wa Mikocheni A alifikishwa mbele ya Hakimu Mkazi wa Mahakama ya Temeke, Khasim Mkwawa, jana akiwa pamoja na mshitakiwa mwenzake John Mwangiombo (32), kujibu tuhuma za mauaji.
Akisoma hati ya Mashtaka, Mwendesha Mashtaka Inspekta wa Polisi Dastan Kombe aliiambia Mahakama hiyo kuwa Aprili 10 mwaka huu majira ya saa 6.30 usiku eneo la Mjimwema Kigamboni, washitakiwa walishirikiana kumpiga na kumchoma moto Lila Hussen (34) na kumsababishia kifo.
Hata hivyo, Hakimu Mkwawa aliwataka washtakiwa wote kutojibu shtaka hilo kwa kuwa Mahakama hiyo haina uwezo wa kusikiliza na kesi hiyo imeahirishwa hadi Mei 2, mwaka huu kwa kutajwa tena.
Hata hivyo, ndugu wa marehemu Lila hawakufika mahakamani kwa kile kilichoelezwa kuwa walikuwa wanashughulikia utaratibu wa mazishi wa ndugu yao.
Inadaiwa alichomwa moto na washtakiwa baada ya kuingia hotelini hapo kwa ajili ya kuwatafuta wageni wake, ambapo washtakiwa hao walimwagia mafuta na kumvisha tairi na baadaye kumuwasha kwa kibiriti.
Hata hivyo, marehemu kabla ya kifo chake alilazwa katika Hospitali ya Taifa ya Muhimbili (MNH).
Akithibitisha kifo hicho, Kamanda wa Mkoa wa Kipolisi wa Temeke, Devid Misime, alisema Lila alifariki usiku wa kuamkia juzi hospitalini hapo baada ya juhudi za madaktari kuokoa maisha yake kushindikana.

*********************
Mauaji Ya Kutisha Jijini Dar es salaam

• Baba aua wanawe wawili kwa kisu
• Mama naye ajeruhiwa, alazwa

Mwalimu wa Shule ya Sekondari Mondo, Wilaya ya Kondoa, mkoani Dodoma, Kassim Bindo (25), anatuhumiwa kuua kikatili watoto wawili wa kaka yake na kumjeruhi mama yao jijini Dar es Salaam.
Mtuhumiwa huyo ambaye anatafutwa na Polisi Mkoa wa Ilala, anadaiwa kuwaua watoto hao wa kike kwa kuwachoma kisu tumboni pamoja na kumchoma kifuani mama yao.
Bindo, ambaye ni mkazi wa Kipunguni ‘B’ Machimbo, Wilaya Ilala, jijini Dar es Salaam, anatuhumiwa kuwaua Mwanamkasi Shabani (4) na Asha Shabani mwenye umri wa siku 40.
Anatuhumiwa kufanya kitendo hicho katika eneo hilo, saa 5:30 usiku wa kuamkia jana wakati watoto hao na mama yao wakiwa wamelala nyumbani kwa babu yao, Bakari Bindo.
Kamanda wa Polisi Mkoa wa Ilala, Faustine Shilogile, alithibitisha kutokea kwa mauaji hayo na kuongeza kuwa mtuhumiwa alitoroka muda mfupi baada ya kufanya mauaji hayo.
Kamanda Shilogile alisema Polisi wanaendelea kumsaka Kassim kutokana na mauaji hayo.
Baba mzazi wa mtuhumiwa, Bakari Bindo, aliiambia NIPASHE kuwa watoto hao walifariki dunia papo hapo, wakati mama yao, Kuruthumu Shabani (28), alijeruhiwa kwa kuchomwa kisu kifuani.
Kwa mujibu wa Bindo, mwanawe, Kassim, aliwahi kulazwa miaka ya nyuma katika Hospitali ya Taifa Muhimbili (MNH) wodi ya wagonjwa wa akili na kuruhusiwa baada ya wiki mbili na nusu.
Alisema kuwa miili ya marehemu hao imehifadhiwa MNH na kwamba mazishi yatafanyika leo.
Bindo alisema kuwa mazishi hayo yalipangwa kufanyika jana, lakini yaliahirishwa kutokana na baba mzazi wa watoto hao, Shabani Bakari, kuchelewa kurejea jana kutoka Morogoro anakofanya kazi.
CHANZO: NIPASHE