Maelfu ya watu wapoteza makazi yao kutokana na mafuriko Ethiopia

Mvua zilizonyesha kwa siku kadhaa katika maeneo ya kaskazinimashariki mwa Ethiopia zimepelekea watu wasiopungua 16 elfu kupoteza makazi yao sambamba na kuharibu vibaya sekta ya kilimo na mifugo.
Ofisi ya Umoja wa Mataifa ya Uratibu wa Masuala ya Kibinaadamu imesema kuwa, mazao na mifugo imekombwa na maji, barabara zimeharibika na madaraja yameburutwa na maji ya mafuriko hayo huko Afar, kaskazinimashariki mwa Ethiopia.
Itakumbukwa kuwa mapema mwezi uliopita wa Agosti, mvua kali zilisababisha mafuriko katikati mwa Ethiopia na kupelekea watu 19 kupoteza maisha na zaidi ya 11 elfu wengine kukosa makazi.
Mwaka 2006 watu 600 walipoteza maisha na karibu laki tatu wengine wakaathiriwa na mafuriko yaliyoikumba Ethiopia ambapo mwaka wa kabla yake yaani 2005 mafuriko yaliyoikumba nchi hiyo yaliwatia hasara zaidi ya watu laki moja na 83 elfu.