Makumi wauawa na kujeruhiwa kwenye mapigano makali Somalia

Kwa akali watu 21 wameuawa na makumi ya wengine kujeruhiwa, katika mapigano makali yaliyotokea nchini Somalia. Taasisi ya Kutetea Haki za Binadamu ya 'Ilman' yenye makao yake mjini Mogadishu imetangaza kuwa, watu wasiopungua 14 wameuawa na wengine 24 kujeruhiwa kwenye mapigano yaliyotokea kati ya makabila mawili kwenye kijiji kimoja kilichoko katikati mwa nchi hiyo. Taasisi hiyo imeongeza kuwa, watu wengine saba wameuawa na wengine kumi na nane kujeruhiwa, katika mapigano yaliyotokea kati ya vikosi vya kulinda amani vya Umoja wa Afrika na waasi wanaobeba silaha wa kundi la ash Shabaab mjini Mogadishu. Taarifa ya taasisi ya Ilman imeongeza kuwa, tokea mwaka 2007 hadi sasa, zaidi ya watu elfu ishirini na moja wameuawa kutokana na mapigano ya wenyewe kwa wenyewe nchini Somalia.
********************** 
Mahakama ya ICTR yamfunga miaka 25 jela mshukiwa wa mauaji ya kimbari   

Mahakama ya Kimataifa kwa ajili ya Rwanda ICTR imemhukumu kifungo cha miaka 25 jela mshukiwa mkongwe wa mauaji ya kimbari ya mwaka 1994 nchini Rwanda ambapo kwa akali watu wasiopungua laki nane waliuawa wengi wao wakiwa wa kabila la Watutsi. Yusuf Munyakazi mwenye umri wa miaka 75 amepatikana na hatia ya kuhusika kwenye mauji hayo pamoja kuwabaka wanawake wa Kitutsi waliokuwa wamekimbilia kwenye kanisa moja kutafuta hifadhi. Munyakazi alitiwa mbaroni mwaka 2004 katika Jamhuri ya Kidemokrasia ya Congo na kufikishwa kwenye mahakama hiyo yenye makao yake mjini Arusha Tanzania.
kiswahili.irib.ir