Mahojiano na mgombea urais Zanzibar Dr.Gharib Bilal 

Mji Mkongwe wa Zanzibar Kinyanganyiro cha kumtafuta atakayekuwa mgombea wa kiti cha Urais kwa niaba ya chama tawala CCM nchini Tanzania kimeanza.

 Mji Mkongwe wa Zanzibar 

Wakati kwa upande wa Jamhuri ya Muungano ni Rais wa sasa Jakaya Kikwete, shauku kubwa zaidi ni huko Zanzibar ambako rais wa sasa Amani Karume anamaliza muda wake baada ya mihula miwili kwa mujibu wa katiba. 

Tayari wanasiasa wanane wameshachukua fomu akiwemo Makamu wa rais wa Tanzania Dr.Ali Mohamed Shein na aliyekuwa Waziri kiongozi wa Zanzibar Dr.Gharib Bilal ambaye hii ni mara yake ya tatu kuwania kiti hicho, baada ya kufanya hivyo mwaka 2000 na mwaka 2005 kabla ya kutakiwa na viongozi wa ngazi ya juu wa CCM kuondoa jina lake. 

Mohamed Abdul-Rahman amezungumza punde na Dr. Bilal na kwanza anaelezea kwanini akaamua kuchukua fomu na kugombea tena safari hii? 

Interview :Mohamed Abdul-Rahman/Dr Gharib Bilal.

Maafisa watatu wa kulinda amani wa UNAMID wauawa Darfur

Maafisa watatu wa kulinda amani wameuliwa kwa kupigwa risasi na watu wenye silaha huko Darfur, magharibi mwa Sudan.

Maafisa hao wameuawa wakati walipokuwa wanalinda amani katika kambi moja kwenye eneo la Nertiti la Darfur Magharibi.

Kemal Saiki, mkurugenzi wa masuala ya mawasiliano wa kikosi cha kulinda amani ya Umoja wa Afrika na Umoja wa Mataifa UNAMID amenukuliwa akisema kwamba, karibu watu 20 wenye silaha walivamia eneo hilo na kuua maafisa watatu wa kulinda amani wa kikosi hicho kwa kutumia silaha za otomatiki.

Kwa mujibu wa takwimu za Umoja wa Mataifa, watu wapatao laki tatu wameshauawa na wengine milioni 2.7 wameyakimbia makazi yao tangu jimbo la Darfur lilipoanza kukumbwa na machafuko mwaka 2003

Watu 50 wauawa ajali ya treni Congo

Congo Brazzaville

Takriban watu 50 wameuawa katika ajali ya treni kusini mwa Congo-Brazzaville.

Mkuu wa mamlaka ya safari za reli nchini humo amesema ajali hiyo ilitokea Jumatatu kilomita 60 kutoka mji wa Pointe-Noire.

Treni hiyo inaamika kupoteza mwelekeo wakati ilipofika karibu na Bilinga na baadhi ya mabehewa yake yakaanguka.

Watu waliokufa wamepelekwa katika vyumba vya kuhifadhi maiti huku waliojeruhiwa wakipelekwa hospitalini.

''Ilitokea ajali mbaya sana ya treni usiku'', Mkuu wa mamlaka ya safari za treni Sauveur Joseph El Bez ameliambia shirika la habari la AFP.''watu wengi wamejeruhiwa na wengine kufa.''

Mshauri wa wizara ya uchukuzi Alphonse Pepa amethibitisha kutokea kwa ajali hiyo. 

Usimamizi mbaya

Mwandishi wa BBC anasema reli hiyo yenye urefu wa kilomita 500 ilijengwa kati ya mwaka 1920 na 1930 wakati wa enzi ya ukoloni ambapo Ufaransa ilikuwa ikitawala nchi hiyo.

Tangu wakati huo reli hiyo haijakuwa ikisimamiwa vizuri.

Reli kati ya mji mkuu Brazzaville na Pointe-Noire ilifungwa miaka ya tisini wakati wa vita vya wenyewe kwa wenyewe nchini humo na tangu ilipofunguliwa kumetokea ajali mbili mbaya.

Ajali hii ndiyo mbaya zaidi kutokea katika siku za hivi karibuni.

Mwishoni mwa juma ndege iliyokuwa imebeba wakurugenzi wa kampuni ya uchimbaji madini kutoka Australia ilianguka na kusababisha vifo vya abiria wote 11.