BARCLAYS YATANGAZA KUONGEZA MUDA WA KAMPUNI YA AMANA ZA MUDA MAALUMU‏

Mkuu wa Bidhaa, Huduma na Utafiti wa Benki ya Barclays Tanzania, Samwel Mkuyu (kushoto) akizungumza na waandishi wa habari jijini Dar es Salaam leo wakati benki hiyo ikitangaza kuongeza muda wa kampeni yake ya Amana za Muda Maalumu. Pamoja naye ni Mkuu wa Mawasiliano wa Barclays, Tunu Kavishe.

====

TAARIFA KWA VYOMBO VYA HABARI

Barclays Yaongeza Muda wa Kampeni Yake ya Amana za Muda Maalumu

Oktoba 2, 2012, Dar es Salaam, Benki ya Barclays Tanzania imetangaza kuongeza muda wa kampeni yake ya Amana za Muda Maalumu hadi Desemba 31 Mwaka huu. Kampeni hii ilizinduliwa rasmi Agosti 6, 2012 na ilikuwa ifikie mwisho wake Desemba 6 Mwaka huu. Wateja wa Barclays wa Kitengo cha Kibenki cha akaunti binafsi kama vile Wateja Binafsi, Wateja Wakubwa na Wafanyabiashara wanaweza kufurahia faida ya kuweka Amana za Muda Maalumu na Barclays.   

Kampeni hii imetengenezwa kupitia bidhaa ya kipekee ya Barclays inayofahamika kama ‘Regular Interest Fixed Deposit’. Mteja anayefungua Akaunti ya Amana ya Muda Maalumu yenye Faida ya Kawaida ataweza kulipwa faida ya amana yake kila mwezi kwa kipindi chote cha muda wa amana yake tofauti na ilivyo kwamba faida hutolewa tu mwishoni mwa kipindi cha akaunti hiyo maalumu..

“Kiwango cha chini ambacho wateja wanatakiwa kuwa nacho ni shs milioni 15 na muda wa chini ambao amana hiyo itatakiwa kuwemo katika akaunti ya Barclays ni mwaka mmoja na muda wa juu ni miaka 5,” alisema Mkuu wa Bidhaa, Huduma na Utafiti wa Barclays, Samwel Mkuyu.

Bwana Mkuyu aliongeza kwa kusema: “Faida ya kila mwezi kwa wateja italipwa kwenye akaunti zao za kawaida na faida kwenye fedha ya msingi iliyowekwa kwenye akaunti ya Muda Maalumu itatolewa mwishoni mwa kipindi husika.  Tuna aina tofauti kwa viwango tofauti na maelezo yake kwa kina yanapatikana kwenye matawi yetu yote nchini Tanzania. ”

Aliendelea: “Sisi Barclays, tumedhamiria kuifanya sekta ya benki Tanzania kuwa rahisi zaidi kwa wateja wetu kwa kuleta huduma rahisi zinazopatikana kwa wote. Wateja wetu wataendelea kufurahia huduma za bure za kidijitali ikiwa ni pamoja na kutoa fedha bure kwenye mashine za ATM, huduma ya bure ya ujumbe mfupi kupitia simu za mkononi, kupata taarifa za akaunti bure kupitia mtandao na huduma za kibenki kupitia mtandao wa intaneti”.