'Waliompiga risasi' Nyamwasa, mahakamani

Luteni Jenerali Kayumba Nyamwasa

Watu wanne wamefikishwa mahakamani nchini Afrika Kusini wakishtakiwa kwa njama ya kumuua aliyekuwa mkuu wa jeshi nchini Rwanda Luteni General Kayumba Nyamwasa.

Inafahamika kuwa washukiwa hao wanne waliofikishwa mahakamani ni kutoka Tanzania, Somalia na Msumbiji.

Wote wanakabiliwa na mashataka ya kupanga njama ya mauaji na watafikishwa tena mahakamani Julai 14.

Watu wengine wawili waliokamatwa wakati wa msako mkuu wa polisi waliachiliwa baada ya mashtaka dhidi yao kufutwa.

Luteni Jenerali Faustin Kayumba Nyamwasa ambae alikuwa mwandani mkubwa wa Rais Paul Kagame sasa amegeuka kuwa mkosoaji wake mkubwa na alikwenda kuishi uhamishoni nchini Afrika Kusini mapema mwaka huu.

Serikali ya Rwanda inataka arejeshwe nchini humo kwasababu wanaamini amehusika na mashambulio kadhaa ya maguruneti mjini Kigali mwanzoni mwa mwaka huu.

Jenerali Nyamwasa anaamini serikali ya Rwanda ndiyo iliyohusika na jaribio la kumuua kwa risasi alipokuwa anaelekea nyumbani kwake mjini Johannesburg.

Serikali ya Rwanda inakanusha madai hayo kwa kusema hakuna sababu yoyote ya kumuua.

***************************** 

Waziri Mkuu wa Kenya afanyiwa upasuaji

Waziri Mkuu wa Kenya, Raila Odinga

Daktari wa Waziri Mkuu Raila Odinga, Oluoch Olunya, amethibitisha kuwa Odinga amefanyiwa upasuaji katika ubongo wake baada ya kubainika kuwa kulikuwepo na shinikizo kubwa katika kichwa chake.

Daktari Olunya aliyekuwa akihutubia waandishi wa habari kuhusiana na kulazwa kwa Waziri Mkuu katika hospitali ya Nairobi, amesema kwamba Waziri Mkuu aliwaambia kuwa aligonga kichwa chake kwenye gari lake majuma matatu yaliyopita.
Mtaalamu huyo wa upasuaji wa ubongo amesema kuwa Odinga anaendelea kupata nafuu na kwamba ameweza kukaa kwa urahisi katika chumba chake hospitalini.
Muuguzi huyo pia amesema Raila ana uchovu mwingi mwilini na anahitaji kulazwa kwa siku tano zijazo.
Awali taarifa kutoka kwa ofisi yake ilidai kwamba alikuwa na uchovu tu.
Bwana Odinga alipelekwa hospitalini Jumatatu mchana baada ya kushiriki mkutano wa kisiasa na madaktari wake waliamuru apumzike hospitalini.
Hadi sasa Raila Odinga mwenye umri wa miaka 65 amekuwa ni mtu mkakamavu.
Katika miezi ya hivi karibuni amekuwa akipigia debe katiba mpya inayopendekezwa na hajaripotiwa kuwa na matatizo ya kiafya.
Taarifa ya kupasualiwa kwake imewashangaza wengi.
Hadi sasa , maswali mengi kuhusu afya ya kiongozi nchini Kenya yameelekezwa kwa rais Mwai kibaki.
Baada ya uchaguzi wa mwaka 2003 kulikuwa na tetesi kwamba alipata kiarusi. Hata hivyo maafisa wake walikanusha madai hayo wakisema alikuwa na matatizo madogo tu ya kiafya.
bbc swahili