Kiongozi wa Upinzani azuiliwa-Rwanda

Ingabire: Wafuasi wake ni miongoni mwa waliokamatwa

Polisi nchini Rwanda wanamzuilia kiongozi wa chama cha upinzani cha PS Imberakuri, Bernard Ntaganda kwa madai ya uchochezi na kubuni chama cha waasi.

Hii ni baada ya Rais Paul Kagame kuzungumzia jaribio la kufanyika maandamano hapo jana, wakati tume ya uchaguzi nchini humo ilipoanza kupokea majina ya watu wanaotaka kugombea kiti cha urais utakaofanyika mwezi wa nane.

Rais Kagame anasema wahusika lazima wafuate sheria lakini upande wa upinzani unadai kuwa vyombo vya dola vinawabana.

Msemaji wa polisi Eric Kayiranga, amethibitisha kukamatwa kwa Bernard Ntaganda, lakini amesema bado haja funguliwa mashtaka.

Kiongozi mwingine wa Upinzani Victoire Ingabire amesema wajumbe wa chama chake cha United Democratic Forces walikamatwa wakati wa maandamano mjini Kigali.

*******************************

Utata alipo Agathon wa Burundi

Bw Agathon Rwasa

Waziri wa ulinzi wa Burundi amesema anatumai kiongozi wa chama kikuu cha upinzani na aliyekuwa kiongozi wa waasi Agathon Rwasa hajajificha.

Kauli hiyo ameitoa kufuatia ripoti kuwa Bw Rwasa, aliyetia saini makubaliano ya amani mwaka jana kusalimisha silaha, hajaonekana tangu Jumatano asubuhi.

Mapema mwezi huu alijitoa kwenye uchaguzi unaotarajiwa kufanyika Jumatatu.

Uchaguzi huo utakuwa wa pili tangu kumalizika kwa mauaji ya kikatili ya wenyewe kwa wenyewe yaliyokuwa kwenye misingi ya kikabila yaliyodumu miaka 12.

Rais Pierre Nkurunziza na Bw Rwasa waliongoza zaidi kundi la waasi la Kihutu waliokuwa wakipigana dhidi ya jeshi la serikali lililodhibitiwa na Watutsi walio wachache.

Bw Rwasa alikataa kuacha mapigano wakati makundi mengine yalipoamua kuunda serikali ya muungano yaliyofuatiwa na uchaguzi mwaka 2005.

Aliiongoza National Liberation Force (FNL) kusalimisha silaha Aprili 2009 na amekuwa akidhaniwa kuwa mpinzani mkuu wa Rais Nkurunziza katika uchaguzi wa wiki ijayo. bbc swahili