Obama amfuta kazi generali McChrystal

Generali aliyeachishwa kazi nchini Afghanistan Stanley McChrystal

Rais wa Marekani, Barack Obama, amemteua mmoja wa maafisa wake wakuu jeshini Generali David Petraeus, kama kamanda mkuu wa majeshi yote ya kigeni nchini Afghanistan.

Hii ni kufuatia kuachishwa kazi ghafla kwa ,Generali Stanley McChrystal kuhusu matamshi yake ya kuhujumu serikali ya Obama.

Kulingana na rais Obama matamshi ya McChristal yameonyesha hana imani na serikali na pia ni ya kuhujumu jeshi analolihudumia.

Jenerali McChrystal aliitwa kutoka Afghanistan kwenda Washington kujieleza kutokana na kauli aliyoitoa dhidi ya utawala wa Marekani.

Matamshi aliyotatoa bwana McChrystal yamechapishwa kwenye jarida la Rolling Stone.

Mwandishi wa BBC wa maswala ya usalama alisema kuwa generali Petraeus alikuwa miongoni mwa watu waliopelekwa vitani Iraq na kubuni sera ambazo sasa zinatumika kutafuta usalama na kumaliza vita nchini humo.

**************************

Washukiwa wa njama ya kumuua Nyamwasa waachiwa

Generali wa zamani jeshini Rwanda Kayumba Nyamwasa

Polisi nchini Afrika Kusini wameachilia washukiwa wawili waliokamatwa kufuatia jaribio la kumuua kamanda wa zamani wa jeshi la Rwanda mjini Johannesburg Kayumba Nyamwasa.

Kwa mujibu wa msemaji wa polisi washukiwa wengine wanne waliosalia watafikishwa mahakamani tarehe ishirini na tisa mwezi ujao.

Luteni Generali Kayumba Nyamwasa alikuwa anarejea nyumbani Jumamosi iliyopita wakati alipopigwa risasi tumboni na mtu asiyejulikana.

Bwana Nyamwasa angali anapata nafuu. Mkewe amedai serikali ya Rwanda inahusika na njama ya kumuua generali huyo wa zamani, madai ambayo Rwanda imekanusha.