Mwandishi wa habari auwawa Rwanda

Jean Leonard Rugambage aliuawa nje ya nyumba yake mjini Kigali.

Mwandishi mmoja wa habari wa gazeti binafsi amepigwa risasi na kuuwawa nje ya nyumba yake huko Kigali mji mkuu wa Rwanda.

Walioshuhudia wamesema mwandishi huyo, Jean Leonard Rugambage, ambaye alikuwa kaimu mhariri wa gazeti la Umuvugizi alipigwa risasi na watu wawili ambao baadaye walitoweka kwa gari.

Hivi karibuni serikali ya Rwanda iliagiza kusimamishwa kwa uchapishaji wa gazeti hilo, na likaanza kuandika habari kwenye mtandao.

Uchunguzi

Polisi wamesema hawajui nani aliyefanya mauaji hayo, lakini mhariri mkuu wa gazeti hilo ambaye yuko uhamishoni, Jean Bosco Gasasira, ameilaumu serikali.

Gasasira ambaye alitorokea Uganda mwezi Aprili baada ya gazeti lake kusimamishwa, na anadai serikali ya Rwanda ilipanga mauaji ya mwandishi Rugambage.

Amedai kwamba ana uhakika mwandishi huyo alipigwa risasi na kuuawa na maafisa kutoka idara ya usalama wa taifa.

Gasasira amesema mauaji hayo yametokana na taarifa zilizochapishwa kwenye tovuti ya gazeti la Umuvugizi kuhusiana na jaribio la mauaji ya ya mkuu wa zamani wa jeshi la Rwanda, Luteni Jenerali Faustin Kayumba Nyamwasa nchini Afrika Kusini, mwishoni mwa wiki iliyopita.

Serikali ya Rwanda imeshakanusha kuhusika na kupigwa risasi kwa Luteni Jenerali Nyamwasa. Mkuu huyo wa zamani wa jeshi alikimbilia nchini Afrika Kusini mapema mwaka huu baada ya kutofautiana na Rais Paul Kagame, akimlaumu Rais huyo kwa ufisadi.

Lawama

Bw Kagame amekanusha madai hayo, na serikali yake imemlaumu Lt Gen Nyamwasa kwa kuhusika na mashambulizi ya grineti yaliyotokea nchini Rwanda mapema mwaka huu.

Mwezi Aprili, Rais Kagame alifanya mabadiliko ya uongozi jeshini, na maafisa wawili wa ngazi za juu wakasimamishwa, na kuwekwa katika kifungo cha nyumbani.

Mapema mwezi huu baraza linalodhibiti vyombo vya habari nchini Rwanda lilisimamisha kwa muda wa miezi sita gazeti la Umuvugizi kwa madai ya kuchochea upinzani dhidi ya serikali.

Wavuti wa gazeti hilo uliozinduliwa mwezi Mei kwa wakati huu hauwezi kupatikana kupitia watoaji wa huduma za internet nchini Rwanda, na serikali imekanusha kwamba imehusika katika kubana wavuti huo.

Bw Rugambage ambaye amemwacha mke na mtoto mmoja aliondolewa mashtaka ya kuhusika na mauaji ya kimbari na mahakama ya kijadi ijulikanayo kama Gacaca mwaka 2006.

Mshtuko

Mwandishi wa BBC mjini Kigali, Geoffrey Mutagoma, amesema mauaji hayo yamewashtua waandishi wengi nchini Rwanda.

Uchaguzi wa Rais nchini Rwanda unatazamiwa kufanyika mwezi Agosti, huo ukiwa uchaguzi wa pili kufanyika tangu mauaji ya kikabila ya mwaka 1994.

Makundi ya kutetea haki za binadamu yamekuwa yakiilaumu serikali ya Rwanda kwa kujaribu kunyamazisha vyombo vya habari vya kibinafsi, lakini serikali inakanusha.

Serikali ya Rais Kagame imekuwa ikitoa malalamiko kwamba lazima idhibiti vyombo vya habari pamoja na wanasiasa ili kuepusha kutokea tena kwa mauaji ya kimbari kama ya mwaka 94, ambapo watu 800,000 waliuawa.

Mapema wiki hii Katibu Mkuu wa umoja wa mataifa Ban Ki-Moon alimteuwa Rais Kagame kuwa mmoja wa wenyekiti wa kamati maalum ya watu mashuhuri katika kupambana na umasikini, ambayo ina jukumu la kuchochea kufanikisha malengo ya Milenia ya Umoja wa Mataifa.

Rais Kagame pia amekuwa akisifiwa kwa kujaribu kuimarisha uchumi wa Rwanda kwa kutumia mbinu za kisasa tangu alipochukua uongozi mwishoni mwa mauaji hayo. bbc swahili