Chama cha SPLM chapewa wizara muhimu

Rais wa Sudan akiwa na wafuasi wake

   Chama tawala Kaskazini mwa Sudan kimesema rais Omar Al Bashir amemteuwa raia wa eneo la Kusini kama waziri wa mafuta katika jaribio la kuhifadhi umoja wa kitaifa.

   Afisa mmoja wa chama tawala cha National Congress Party, NCP, Ibrahim Ahmed Omar, ameiambia BBC kuwa hatua hiyo inanuia kujenga imani baada ya juhudi za hapo awali za kuwahakikishi raia wa eneo hilo la Kusini kuwa mapato ya taifa yanayotokana na mafuta yatagawanywa kwa njia ya haki kushindwa kuzaa matunda.

   Amesema chama cha NCP, kinatarajia kuwa uteuzi huo wa raia wa eneo la Kusini kusimamia wizara muhumi, itawashinikiza kupiga kura kupinga kugawanywa kwa taifa hilo mapema mwaka ujao.

   Wakati huo huo Baraza jipya la mawaziri wa serikali ya muungano nchini Sudan litaapishwa hii leo.

Baraza hilo lililotangazwa na rais Omar Al Bashir hapo jana lina jumla ya mawaziri 77, 7 kati yao wakiwa wanawake.

Wabunge 3 kufikishwa mahakamani- Kenya

William Ruto

   Wabunge watatu akiwemo waziri mmoja wanatazamiwa kufikishwa mahakamani hii leo kujibu mashtaka ya uchochezi.

   Wabunge hao walitiwa nguvuni hapo jana na kulala katika kituo cha polisi baada ya kutuhumiwa kutoa matamshi ya kueneza chuki wakati wa kampeni za kupinga raasimu ya katiba mpya inayopendekezwa.
    Malalamiko kuhusu wanasiasa hao yalitolewa na tume inayoshughulikia utangamano wa kitaifa nchini humo.
Mwenyekiti wa tume hiyo Mzalendo kibunja, anasema kuwa tume yake haina nguvu ya kuwachukulia hatua wabunge hao na hivyo watapelekwa mahakamani kujibu mashtaka dhidi yao.
   Inaripotiwa kuwa wawili kati yao walitoa matamshi hayo ya uchochezi wakati wa uzinduzi wa makao makuu ya wanaharakati wanaopinga rasimu hiyo ya katiba wiki mbili zilizopita.
   Watatu naye anatuhumiwa kuwachochea wakaazi wa eneo lake la ubunge tarehe mosi mwezi huu.
Waziri wa Kilimo William Ruto ambaye anaongoza kundi wa wanasiasa wanaopinga katika hiyo inayopendekezwa anasema, serikali inawalenga ili kuwashurutisha kuunga mkono katiba hiyo.
 BBC SWAHILI