Wananchi wa Iraq wanazidi kuwa wahanga wa silaha hatari za Marekani

Wananchi wa Iraq wamekuwa wahanga wa makombora yenye urani iliyodhoofishwa yaliyotumiwa na majeshi ya Marekani nchini Iraq. Taarifa ya Wizara ya Afya ya Iraq inasema kuwa, maradhi ya saratani yameongezeka kwa zaidi ya mara tatu nchini humo, huku wengi wa watoto wanaozaliwa wakiwa na upungufu wa baadhi ya viungo vya mwili. Taarifa hiyo imeeleza kuwa kati ya mwaka 2005 hadi 2007, maradhi ya kansa kwa watoto wa Kiiraqi yameongezeka kwa zaidi ya mara tatu. Taarifa hiyo imeongeza kuwa, mada za sumu za silaha za Marekani zitaendelea kuleta athari mbaya kwa afya ya wananchi wa Iraq hadi miaka hamsini ijayo. Wakati huohuo, taarifa kutoka Iraq zinasema kuwa, idadi ya watoto yatima nchini Iraq imeongezeka na kufikia milioni tano hali ambayo imeshadidisha matatizo ya kiroho na kisaikolojia. Taarifa zinasema kuwa, watoto hao wamekuwa yatima baada ya wazazi wao kuuawa, pale majeshi ya Marekani yalipoanza mashambulizi nchini humo yapata miaka saba iliyopita.
Kiswahili Radio.