Mawaziri wa Fedha wa Umoja wa Ulaya waahidi haraka kuilinda Euro

Mawaziri wa Fedha wa nchi wanachama wa Umoja wa Ulaya wamekubaliana kwamba kuna udharura wa kuwa imara zaidi kwenye bajeti zao hasa katika wakati huu ambapo Ugiriki inakabiliwa na tatizo la madeni. Pia baada ya kukosolewa kwamba nchi za Ulaya hazikuchukua hatua za kutosha ili kuilinda Euro, mawaziri hao wameahidi kuchukua hatua za haraka zaidi na zenye athari zaidi katika mustakbali kuhusu suala hilo. Herman Van Rompuy Mkuu wa Kamisheni ya Ulaya amesema kuwa, nchi wanachama zimekubaliana juu ya malengo muhimu manne, mojawapo ni kwamba wanapaswa kujiwekea vikwazo vipya ili kuhakikisha sheria zinafuatwa. Wamesema kuwa, nchi ambazo zitapata nakisi kubwa zaidi ya kiwango kilichowekwa kwenye bajeti zao, zitaweza kupoteza haki ya kupewa fedha na nchi wanachama au kupoteza haki ya kupiga kura. Katika siku za hivi karibuni, Euro imepungua thamani na kufikia kiwango cha chini zaidi kuwahi kushuhudiwa katika miaka minne iliyopita ikilinganishwa na dola.
Kiswahili Radio.