Anayedaiwa kuua watu watano awinda wengine

MLINZI wa sekondari ya Aboud Jumbe, Kigamboni,Shemsa Mpelela (22), aliyetoroka baada ya kutuhumiwa kuchoma moto nyumba na kuua watu watano wa familia moja, ameonekana usiku wa kuamkia jana eneo la shule hiyo akiwa na silaha.
Walioteketea kwa moto wakiwa katika nyumba yao yenye chumba kimoja ni baba mwenye nyumba John Onesmo (32) ambaye ni mfanyabiashara wa samaki eneo la Feri, Catherine John (25), anayefanya biashara ndogondogo, watoto wao Oliver (2) na Joyce John (5) na Esther Amos (20) ambaye ni mdogo wa Catherine.
Esther anadaiwa alikuwa na uhusiano wa kimapenzi na Shemsa na kutokana na ugomvi baina yao, alidaiwa kuchoma nyumba hiyo usiku wa kuamkia juzi.
Kaimu Mwalimu Mkuu wa Aboud Jumbe, Pasisi Mwinchumu, aliliambia gazeti hili jana, kuwa alipewa taarifa kwamba Mpelela, anayeishi Kisiwani Kigamboni, ambaye kwa mujibu wa ratiba yake alitakiwa kufika kazini juzi saa 12.30 jioni, alifika saa 8:48 usiku akiwa na chuma kizito na kuonekana akirandaranda shuleni hapo.
Taarifa zilisema mtuhumiwa akiwa na chuma hicho, alikwenda sehemu iliyozoeleka kukaa mlinzi mwenzake na kunyatia na baada ya kukosa mtu yeyote pale, aliendelea kuvinjari eneo la shule hiyo.
Wakati anavinjari watu walimwona na kutoa taarifa Polisi ambao hata hivyo walifika eneo hilo saa 10 alfajiri jana wakiwa na gari aina ya Land Rover Defender na kukuta mtuhumiwa ameshaondoka.
Ilielezwa kuwa baada ya polisi kufika, walifanya msako kwenye maeneo kadhaa ya shule hiyo ikiwamo madarasani, lakini hawakuambulia kitu.
Mwinchumu alisema kuonekana kwa mlinzi huyo usiku huo, kumezusha hofu shuleni hapo akisema, “hata mimi sasa hivi sikai ofisini kwangu nakaa chumba cha walimu wote”.
Alisema jana jioni walitarajia walimu wakiongozwa na mwalimu mkuu kufanya kikao cha kujadili hali hiyo sambamba na kuchukua hatua za kiusalama.
Kamanda wa Polisi wa Mkoa wa Temeke, David Misime, alipotafutwa kuzungumzia maendeleo ya msako dhidi ya mtuhumiwa huyo, alisema polisi wanaendelea kumsaka ambapo juzi na jana walifanya msako ikiwamo kwenda shuleni hapo mara kwa mara.
Hata hivyo, alisema hana taarifa kama mtuhumiwa huyo alifika shuleni usiku wa kuamkia jana na alipoulizwa kama wamepanga taratibu zozote za ulinzi katika eneo la shule hasa baada ya kuonekana kuwapo hofu miongoni mwa watu, alisema “hao wenye hofu wangekuja kutwambia ili tuangalie cha kufanya”.
Wakimzungumzia zaidi Mpelela, baadhi ya walimu walisema hivi karibuni aliwaeleza kuwa na nia ya kufunga ndoa na mchumba wake ambaye ni Esther.
“Alisema anataka kumwoa mchumba wake huyo, kwani sisi tunamjua alishawahi kuja hapa shuleni wakati fulani Mpelela alipoumwa. Yeye (Mpelela) alituomba tumchangie mahari, lakini tulikuwa hatujamchangia kwani tulisubiri atuombe rasmi,” alisema mmoja wa walimu wa shule hiyo.
Inadaiwa Mpelela alikuwa mpole kwa mwonekano lakini mkali na anafahamu kupigana karate, hali iliyowafanya wanafunzi kumwogopa.
“Wanapokuwapo walinzi wengine, baadhi ya wanafunzi hutoroka na wapo wanaodiriki hata kuwapiga, lakini Mpelela wanamwogopa na anapokuwapo hawathubutu kutoroka wala kumchezea, kwani ni mkali sana kwao,” alisema mmoja wa walimu hao.
Mpelela anadaiwa kuchoma nyumba ya John na familia yake usiku wa kuamkia juzi na kuua watu wote watano waliokuwa ndani. Anadaiwa kutumia mafuta ya petroli.
Siku mbili kabla ya nyumba hiyo kuchomwa, Mpelela inadaiwa aligombana na Esther na kumchoma kisu shingoni na tumboni na kumsababisha akimbilie kwa dada yake, Catherine, na kupelekwa hospitali kwa matibabu na kupewa barua ya Polisi ya kusakwa Mpelela ambaye alitoroka nyumbani kwake tangu siku hiyo na hajulikani aliko.
Hata hivyo, licha ya kutoroka nyumbani kwake Kisiwani, Mpelela alikuwa akienda kazini hadi siku za Jumapili na tangu watu hao wapotezea maisha, hajaonekana kazini.
Watu hao watano wanatarajiwa kuzikwa leo Kisiwani baada ya kuagwa katika hospitali ya Vijibweni.
Imeandikwa na Maulid Ahmed
Habari Leo.