Neno La Leo: Wakati Mwingine Haisaidii Kuongea Na Mwenye Mbwa...!

Ndugu zangu,

Leo asubuhi karibu nikione cha mtema kuni. Nilipokuwa kwenye jogging nikapandisha nikikimbia mpaka juu ya Mlima Gangilonga.

Huko nikaiona picha nzuri ya kuipiga. Mzee Mtema Kuni na mbwa wake sita.

Nikamsalimia Mzee yule kwa Kihehe. Kisha nikamwomba nipige picha. Akanijibu kwa Kihehe kuwa ni sawa.

Basi, Mzee naye akaanza kujiendea zake porini huku mbwa zake sita wakiwa wamelala chini. Kumbe, mbwa hawakufurahia, maana, nilipoanza tu kupiga picha ya kwanza, wakainuka wakibwaka na kunijia kutaka kunishambulia. Na kwa mbwa wale, kauli ile ya mwenye mbwa ya kuwataka kutulia hawakuisikiliza kabisa.

Nami nikiwa peke yangu sikuwa hata na jiwe la kuokota kuwatishia mbwa wale. Lakini, inasemwa, ukimya na utulivu ni silaha pia. Nilisimama wima nikiwa nimetulia tuli.

Na utulivu wangu ule ulionekana kuwashangaza mbwa wale. Bila shaka walishangazwa sana na kujiamini kwangu kule. Hawakujua kuwa sikuwa na cha kufanya, na kuwa kama wangetaka kunivamia wala wasingepata tabu kunitia adabu.

Naam, wakati mwingine haisaidii kuongea na mwenye mbwa! Busara ni kuongea na mbwa wenyewe kwanza!
Maggid Mjengwa.
Iringa.