Makamu wa Pili wa Rais wa Zanzibar Balozi Seif Ali Idi Atoa Taarifa Kuhusiana na Kuzama kwa Meli ya Skagit na hatua Zilizochukuliwa na Serikali Ya Mapinduzi Zanzibar

  Makamu wa Pili wa Rais wa Zanzibar Balozi Seif Ali Idi akitoa taarifa kwa Waandishi wa Habari hawapo pichani kuhusiana na Kuzama kwa Meli ya Skagit na hatua Zilizochukuliwa na Serikali huko katika Ukumbi wa Baraza la wawakilishi la Zamani Kikwajuni Zanzibar.

  Makamu wa Pili wa Rais wa Zanzibar Balozi Seif Ali Idi akifafanua jambo katika Mkutano na Waandishi wa 

Habari kuhusiana na hatua Zilizochukuliwa na Serikali baada ya kuzama kwa Meli ya Skagit huko katika Ukumbi wa Baraza la wawakilishi la Zamani Kikwajuni Zanzibar.

  Mwandishi wa Habari wa Gaazeti la Habari leo Khatib Suleiman akiuliza maswali kwa Makamu wa Pili wa Rais wa Zanzibar Bolozi Seif Ali Idi hayupo pichani katika Mkutano wake na waandishi hao kuhusiana na Kutoa taarifa ya Kuzama kwa Meli ya Skagit na hatua zilizochukuliwa na Serikali huko katika Ukumbi wa Baraza la wawakilishi la Zamani Kikwajuni Zanzibar.

Baadhi ya Waandishi wa Habari waliofika katika Mkutano wa Makamu wa Pili wa Rais wa Zanzibar Balozi Seif Ali Idi kuhusiana na Kutoa taarifa ya Kuzama kwa Meli ya Skagit huko katika Ukumbi wa Baraza la wawakilishi la Zamani Kikwajuni Zanzibar.Picha na Yussuf Simai,Maelezo-Zanzibar

****

Makamo wa Pili wa Rais Zanzibar Balozi Seif Ali Iddi amesema Serikali ya Mapinduzi ya Zanzibar inakusudia kuunda Tume ya uchunguzi wa ajali ya Mv. Skagit iliyozama July 18 mwaka huu ambapo jumla ya abiria 290 walikuwemo katika meli hiyo.Balozi Seif ameyasema hayo alipokuwa akizungumza na waandishi wa habari leo katika ukumbi wa Baraza la Wawakilishi la zamani Kikwajuni kuhusiana na kuzama kwa meli hiyo.

Amesema Tume hiyo itaweza kuishauri Serikali nini cha kufanya katika kuhakikisha kuwa vyombo ambavyo vinachukuwa abiria vinakuwa vya aina gani na kuweka utaratibu mzuri utakaoweza kufanikisha usafiri wa baharini.

Ameongeza kuwa kutokana na hali ya ajali zinazotokea mbali na Tume hiyo,Serikali imeona kuwa ipo haja ya  kupitia sheria zinazohusu usafiri wa baharini na kuweka aina ya viwango vya meli zitakazoruhusiwa kuingizwa nchini na kuchukua abiria.

Makamu wa Pili wa Rais amesema kuwa nia ya Serikali juu ya ununuzi wa Meli kwa ajili ya usafiri ipo pale pale na kwamba juhudi zinaendelea katika kufanikisha suala hilo.

Akizungumzia kuhusu ajali hiyo Balozi amefahamisha kuwa jumla ya watu 146 mpaka sasa wameokolewa wakiwa hai ambapo Maiti 78 zilipatikana wakiwemo wanaume,wanawake na watoto.

Aidha amesema kuwa Chombo hicho kilikuwa na Raia wa kigeni 17 na waliookolewa wakiwa hai ni 15 mmoja amepatikana akiwa amefariki ambaye ni Raia wa Uholanzi na mmoja mpaka sasa hajapatikana.

Wageni hao kutoka nchi za nje ni wa Ubelgiji,Marekani,Ujerumani,Uholanzi pamoja na Israel na Serikali imetoa huduma kwa wageni hao na tayari wameondoka kurudi makwao kwa salama.

Makamo wa Pili wa Rais Balozi Seif Ali Iddi alieleza kuwa kati ya majeruhi 138 waliopelekwa Hospitali kuu ya Mnazimmoja iliyopo mjini Zanzibar kwa uchunguzi hadi kufikia leo wagonjwa wote hao walikwisharuhusiwa baada ya kupata matibabu.Amewataka wananchi popote pale ambapo wataiona maiti wapeleke taarifa kwa Jeshi la Polisi,Wakuu wa Wilaya,Mikoa na Masheha ili taratibu za kuihifadhi maiti hiyo ziweze kuchukuliwa.

mesema kuwa zoezi la uokoji linaendelea na kuwashukuru wananchi Vikosi vya ulinzi vya Tanzania na vya Serikali ya Mapinduzi ya Zanzibar pamoja na vyombo binafsi na wazamiaji kutoka nchi za nje kwa ushirikiano walioutoa uliofanikisha kazi ya uokoji wakiwemo pia waandishi wa habari na wafanyabiashara.