Rais wa Brazil asisitiza juu ya kuimarishwa uhusiano na nchi za Kiafrika

Rais Luiz Lula da Silva wa Brazil ameshiriki kwenye kikao cha Jumuiya ya Ustawi ya Magharibi mwa Afrika ECOWAS nchini Cape Verde na kusisitiza juu ya kuimarishwa uhusiano wa pande zote kati ya nchi hiyo na bara la Afrika. Akizungumza mbele ya wakuu wa nchi kumi wanachama wa ECOWAS, Rais da Silva amesisitiza juu ya kuhifadhiwa umoja na kupigwa hatua za kimaendeleo. Amesema kuwa, licha ya kuwa hivi sasa Brazil haina wenzo mkubwa wa kisiasa, lakini ina suhula nzuri za kiuchumi na utaalamu wa kiufundi, ambazo zinaweza kutumiwa vyema na nchi za Kiafrika. Hadi sasa Rais Lula da Silva ameshazitembelea nchi 25 za Kiafrika tokea aingie madarakani, na baada ya kuondoka Cape Verde, Rais Lula da Silva ameelekea Equatorial Guinea, na leo anatarajiwa kuwasili nchini Kenya, na baada ya hapo ataelekea Tanzania, Zambia na hatimaye nchini Afrika Kusini ambako atashiriki kwenye sherehe za kumalizika kwa michuano ya kombe la dunia nchini humo siku ya Jumapili ijayo. Rais wa Brazil atashiriki kwenye sherehe hizo, huku timu ya nchi yake tayari imeshayaaga mashindano hayo, baada ya kutandikwa na Uholanzi mabao 2 kwa 1 kwenye mechi ya robo fainali.