Nadal ndiye bingwa mpya wa Wimbledon

Rafael Nadal kutoka Uhispania ndiye bingwa wa mwaka huu wa 2010, mashindano ya tennis ya Wimbledon ya Uingereza.

Rafael Nadal ndiye bingwa mpya wa Wimbledon

Nadal, Jumapili, alimshinda mpinzani wake katika fainali ya wanaume, Tomas Berdych kutoka Jamhuri ya Czech, kwa 6-3 7-5 na 6-4.

Mchezaji huyo alisema ushindi huo ulikuwa ni zaidi ya ndoto aliyokuwa nayo kuhusu fainali hiyo, hasa kwa kuwa alitamani sana kuwa katika mashindano ya Wimbledon mwaka jana, lakini hakuweza kushiriki.

Alisisitiza kushiriki katika mashindano ya mwaka huu, na kuondoka na tuzo, bila shaka ni zaidi ya ndoto.

Hii ni mara ya pili Nadal amefanikiwa kutwaa ubingwa wa mashindano ya Wimbledon, yanayofanyika kusini-magharibi mwa mji wa London.

Nadal, ambaye kwa sasa hivi ndiye mchezaji bora zaidi wa kiume ulimwenguni, alimshinda mpinzani wake Berdych kwa ushindi wa moja kwa moja katika seti zote.

Mwaka uliopita wa 2009, Nadal hakuweza kuutetea ubingwa wake kutokana na jeraha.

Kwa jumla, Nadal kufikia sasa amewahi kuwa bingwa katika mashindano manane makubwa, yaani Grand Slam.

Katika mashindano ya kina dada, Serena Williams kutoka Marekani aliweza kuwa bingwa wa Wimbledon aliposhinda katika fainali iliyochezwa siku ya Jumamosi.
*************************

Kocha Dunga avuliwa ukufunzi wa Brazil

Mkufunzi wa timu ya soka ya taifa ya Brazil Carlos Verri Dunga amevuliwa ukufunzi wake na Shirikisho la Soka la Brazil CBF baada ya timu hiyo ambayo ni mibabe ya soka na mshindi wa mara 5 wa kombe la dunia kubanduliwa katika robofainali. Kocha Dunga ametimuliwa pamoja na benchi lake lote la ukufunzi. Shirikisho la CBF limesema kuwa, kocha mpya anatarajiwa kuajiriwa mwishoni mwa mwezi huu. Duru zetu za spoti zinaarifu kuwa, huenda mmoja kati ya aliyekuwa kocha wa klabu ya AC Milan Leonardo, kocha wa klabu ya Corinthians Mano Menezes ama kocha wa kitambo wa timu hiyo Wanderly Luxembergo akateuliwa kuchukua kofia ya kocha dunga.