Kiongozi wa Upinzani atangazwa mshindi uchaguzi wa rais Somaliland

Ahmed Mohamed Silanyo kiongozi wa chma cha upinzani cha eneo lililotangaza kujitenga la Somaliland ametangazwa kuwa mshindi wa uchaguzi wa rais uliofanyika Juni 26. Essa Yusuf Mohammed mwenyekiti wa Tume ya Uchaguzi ya eneo hilo ametangaza kwamba, Silanyo ambaye ni kiongozi wa chama cha upinzani cha Kulmiye amepata asilimia 49.6 ya kura na kumshinda Rais Dahir Riyale Kahin aliyepata asilimia 33.2 ya kura. Hii ni katika hali ambayo Faisal Ali Warabe mgombea wa chama cha Haki na Uadilifu amepata asilimia 17.2 ya kura katika uchaguzi huo. Eneo linalojitawala la Jamhuri ya Somaliland lililoko kaskazini mashariki mwa Somalia na ambalo ni koloni la zamani la Uingereza, lilijitenga na Somalia mwaka 1991 lakini hadi sasa halijatambuliwa kimataifa kuwa ni taifa huru. Pamoja na hayo Somaliland inashuhudia amani ikilinganishwa na maeneo mengine ya Somalia.