Kenya yaelezea wasi wasi wa kushambuliwa

Moses Wetangula

Waziri wa mambo ya nje wa Kenya Moses Wetangula, ameonya kuwa wapiganaji wengi wa Kiislamu wanaingia nchini Somali, kwa nia ya kufanya mashambulizi dhidi ya majirani wake, ikiwemo Kenya.

Wetangula amesema kumekuwa na idadi kubwa ya raia wa Afghanistan, Pakistan na kutoka nchi za Mashariki ya Kati wanaoingia nchini Somalia.

Wetangula hata hivyo hajasema ni wapiganaji wangapi wamefanikiwa kufika nchini humo, lakini amesema ni iadi yake ni kubwa kiasi kwamba Kenya pamoja na jamii ya kimataifa imeanza kuwa na wasi wasi.

Amesema hali hiyo inahitaji kushughulikiwa kwa dharura.

Siku ya Jumatatu rais wa Somalia, Sheikh Sharif Sheikh Ahmed, alionya kuwa taifa hilo lina thibitiwa na kundi la kigadi la Al-Qaeda na makundi mengine ya wapiganaji wa Kiislamu.

****************************** 

Matatizo ya moyo huenda yalisababisha kifo cha Chebeya

Floribert Chabeya

Kundi la wachunguzi wa kimatibabu wa kimataifa wanaochunguza chanzo cha kifo cha mwanaharakati wa kutetea haki za kibinadam nchini jamuhuri ya Kidemokrasia ya Congo, wamesema hawajafanikiwa kutambua kile kilichosababisha kifo hicho.

Wachunguzi hao wanasema kifo hicho huenda kilisababisha na matatizo ya moyo.

Mwili wa Floribert Chebeya, ulipatikana ndani ya gari lake huku mikono yake ikiwa imefungwa, siku moja tu baada ya kuamriwa kufika mbele ya afisa mkuu wa polisi nchini humo, John Numbi.

Chabeya alifahamika kutokana na juhudi zake za kupinga mauaji ya kiholela nchini Congo.

Kifo chake kilisababisha raia wa nchi hiyo na wanaharakati wa kuetetea haki za kibinadamn kuitisha uchunguzi wa kimataifa.

Ilifahamika wazi kuwa Bw. Chabeya alikuwa na matatizo ya moyo kwa muda mrefu.

Madaktari kutoka Uholansi kwa ushirikiano na wenzao kutoka Congo walifanya uchunguzi huo.

bbc swahili.