Atuhumiwa kumuua mdeni kwa kuchoma nyumba

MKAZI wa Kijiji cha Mkalamo wilayani hapa, Benny Barton (29) anashikiliwa na Polisi kwa tuhuma za kuchoma moto nyumba na kusababisha kifo na majeruhi.
Kaimu Kamanda wa Polisi Mkoa wa Tanga, Jaffar Mohamed alimtaja aliyekufa kuwa ni mmiliki wa nyumba hiyo, Amiri Abdala (48).
Kwa mujibu wa Mohamed, tukio hilo lilitokea Mei 20 mwaka huu saa 5.00 usiku kijijini Mkalamo.
Mke wa marehemu, Lucia Albert (33) amejeruhiwa sehemu mbalimbali za mwili. Kaimu Kamanda alisema mtuhumiwa anadaiwa kufanya kitendo hicho kutokana na kile kilichoelezwa kuwa ni hasira ya kucheleweshwa kulipwa fedha alizokuwa akiwadai wanafamilia hao baada ya kuwauzia baiskeli.
Alibainisha kuwa inadaiwa awali, waliuziana baiskeli kwa thamani ya Sh 40,000. Inadaiwa kabla ya tukio hilo, wanafamilia hao walimlipa Sh 15,000, hatua iliyosababisha waendelee kudaiwa kiasi kilichobaki kwa muda mrefu.
"Hawa jamaa baada ya kuuziana baiskeli kwa bei waliyokubaliana na kutanguliza shilingi elfu kumi na tano, inadaiwa iliwachukua muda mrefu kulipa deni linalowakabili mtuhumiwa baada ya kuona wanachelewa ndipo aliamua kuwavizia wakiwa wamelala usiku na kuwasha moto nyumba hiyo kama njia ya kufidia deni lake," alisema kaimu kamanda.
Abdala alikufa njiani wakati wanakijiji wakimkimbiza Hospitali ya Wilaya ya Pangani. Mkewe amelazwa katika Hospitali ya mkoa wa Tanga ya Bombo. Mtuhumiwa amezuiwa katika kituo kidogo cha polisi cha Pangani na anatarajiwa kufikishwa mahakamani leo.
Habari Leo.