Ujerumani yatwaa nafasi ya tatu

Ujerumani imetwaa taji kutokana na ushindi wa 3-2 dhidi ya Uruguay.

Ujerumani imenyakua nafasi ya tatu kwenye mashindano ya Kombe la Dunia mwaka 2010 nchini Afrika Kusini, baada ya kuifunga Uruguay mabao 3-2 katika uwanja wa Nelson Mandela Bay, mjini Port Elizabeth.

Sami Khedira aliifungia Ujerumani bao la ushindi katika dakika ya 82 baada ya ngome ya ulinzi ya Uruguay kushindwa kuondosha mpira wa kona uliopigwa na Mesut Ozil.

Sekunde chache kabla ya mchuano kumalizika mshambuliaji wa Uruguay Diego Forlan alipiga mpira wa adhabu uliogonga mwamba.

Ujerumani ndio waliotangulia kufunga katika dakika ya 18 kupitia Thomas Muller, kabla ya Edinson Cavani kuisawazishia Uruguay dakika 10 baadaye.

Lala salama

Kipindi cha kwanza kilimalizika 1-1 na dakika 6 baada ya cha pili kuanza Diego Forlan alisukumiza wavuni pasi kutoka kwa Egidio Arevalo, Uruguay ikawa inaongoza 2-1.

Hilo lilikuwa bao la tano la Forlan kwenye michuano hiyo ya Kombe la Dunia, na ni miongoni mwa wafungaji bora.

Katika dakika ya 56, Marcell Jansen aliisawazishia Ujerumani kwa bao la kichwa baada ya krosi ya Jerome Boateng kumzidi mlinda mlango Fernando Muslera.

Baada ya Sami Khedira kuifungia Ujerumani bao la ushindi , Uruguay walizidisha mashambulizi bila mafanikio.

Kocha wa Ujerumani, Joachim Loew, aliwapumzisha wachezaji mashuhuri miongoni mwao mshambuliaji Miroslav Klose, Likas Podolsi na mlinzi Philip Lahm.

Klose alikosa nafasi ya kufikisha goli la 15 idadi ambayo mshambuliaji wa Brazil, Ronaldo amekwisha funga katika historia ya mashindano ya Kombe la Dunia.
**************************

Uchaguzi wa Senate wafanyika Japan

Waziri Mkuu wa Japan Naoto Kan

Japan inapiga kura katika uchaguzi wa baraza la senate, uchaguzi ambao unaonekana kama kura ya maoni kwa utawala wa miezi kumi wa chama cha Democratic Party of Japan (DPJ), kinachoongozwa na Waziri Mkuu Naoto Kan.

Siku ya Jumamosi Bw Kan aliwaambia wafuasi wake kuwa Japan inapaswa kuepukana na mporomoko wa kiuchumi.
Bw Kan aliingia madarakani mwezi uliopita na kura za maoni zinaashiria kuwa chama cha DPJ na washirika wake huenda wakapoteza uwingi wa viti katika baraza hilo la senate.
Ikiwa atapata matokeo mabaya atalazimika kutafuta washirika wapya wa kisiasa, na hata kuna uwezekano wa Bw kan kuondolewa na chama chake, kama anavyosema mwandishi wa BBC mjini Tokyo Roland Buerk.
Chama cha DPJ kilishika hatamu mwezi August mwaka jana na kumaliza utawala wa nusu karne wa wapinzani wao, Liberal Democratic Party.
Bw Kan alirithi uongozi kutoka kwa Yukio Hatoyama aliyejiuzulu baada ya kuwa mamlakani kwa muda wa miezi tisa pekee.
Katika uchaguzi huu, viti 121, ambavyo ni nusu ya viti vyote vya baraza la senate vitashindaniwa.
Wakati huu, chama cha DPJ na mshirika wake, People's New Party, wana viti 122 katika baraza hilo.
Lakini kura za maoni zinaonyesha kuwa DPJ huenda kikapoteza baadhi ya viti hivyo.
Kampeni za uchaguzi zimetawaliwa na mapendekezo ya waziri mkuu kuwa Japan inahitaji kujadili uwezekano wa kupandisha kodi ya mauzo, suala ambalo limewagawa wapiga kura, kulingana na mwandishi wa BBC.
Kiasi cha raia millioni 104 wa Japan wana haki ya kupiga kura.

BBC SWAHILI.