TAASISI zinazojihusisha na utetezi wa haki za binadamu, wanawake na watoto, zimelaani kitendo cha walezi wa mtoto Nasra Rashid (4) kumficha katika boksi tangu akiwa na miezi tisa hadi sasa na kutaka serikali ichukue sheria haraka kwa wote waliohusika.
Taarifa za mtoto Nasra kufichwa katika boksi kwa kipindi chote mkoani Morogoro ziliibuliwa juzi na wasamaria wema baada ya kupewa taarifa kuwa ndani ya nyumba ya Mariam Said aliyehamia mwaka 2010 kuna mtoto amefichwa ndani ya boksi.
Chama cha Waandishi wa Habari Wanawake Tanzania (Tamwa) kimesema kitendo cha kuficha mtoto katika boksi ni cha kikatili ambacho serikali inapaswa kukishughulikia kwanza kwa kuangalia sheria zinazomlinda mtoto za mwaka 2009.
Akielezea sheria hiyo, mratibu wa Kituo cha Usuluhishi cha Tamwa, Gladness Munuo, alisema sheria inayomlinda mtoto ya mwaka 2009 Sura ya pili, kipengele cha 5(1), 5 (2) na 13 pamoja na mambo mengine vinaelezea kwa undani haki na ustawi wa mtoto na kumuelezea ni nani na mambo gani anapaswa kufanyiwa.
Munuo alisema ili haki iweze kutendeka, serikali inatakiwa kutumia sheria hiyo na nyingine kwa kuwa inaelezea dhahiri kuwa mtoto mwenye umri wa chini ya miaka 18 anapaswa kupewa haki na kutotengwa/kubaguliwa kwa rangi yake, mwonekano, jinsia, itikadi, dini, kabila na kufanyiwa ukatili wa aina yeyote.
Kutokana na kitendo hicho, Tamwa inaitaka serikali kumpeleka mtoto huyo kwa madaktari bingwa kwa ajili ya kufanyiwa vipimo na kutibiwa na pia kumtunza katika vituo maalumu vya kulelea watoto yatima, ili aangaliwe kwa karibu na kupewa lishe.
Kituo cha Sheria na Haki za Binadamu (LHRC) kimesema baada ya kusikia taarifa hiyo kimeanza kufuatilia kwa karibu namna mamlaka za serikali zinavyolishughulikia kisheria suala la mtoto huyo.
Mkurugenzi Mtendaji wa LHRC, Dk. Helen Kijo-Bisimba, alisema kituo hicho kitaangalia namna mamlaka za kiserikali ambazo ni Ustawi wa Jamii, Jeshi la Polisi Morogoro na Mahakama zitakavyofanyia kazi suala hilo.
"Tunalaani kitendo cha walezi wa mtoto Nasra kumficha katika boksi na kumnyima haki zake... tunaiomba jamii iliyoguswa na tukio hili kujua na kuchukua majukumu yao kama wazazi na walezi," alisema.
Shirika la Maendeleo ya Wanawake Afrika (Wildaf) pia limelaani na kueleza kwamba limeanza kufuatilia kisheria kitendo hicho, ili kupata ukweli.
Mkurugenzi wa Wildaf nchini, Dk. Judith Odunga, alisema amemwagiza mwakilishi wa kituo cha Morogoro ambako tukio hilo limetokea, Flora Masoyi aanze kufuatilia tukio hilo.
Kwa mujibu wa Kamanda wa Polisi wa Mkoa wa Morogoro (RPC), Leonard Paul, jeshi hilo linaendelea na uchunguzi wa kujua ni kitu gani kilichosababisha mtoto huyo kufichwa katika boksi na kuwahoji wazazi na walezi wake.
CHANZO TANZANIA DAIMA
======
.png "English"){kind=small}
