TAMKO LA WADAU WA HABARI WALIOKUTANA SERENA HOTEL, LEO MACHI 12, 2013 KUJADILI HALI YA KUZOROTA KWA MAZINGIRA YA USALAMA YA WAANDISHI WA HABARI NA WANAHARAKATI WENGINE

KWANZA, wadau wa vyombo vya habari wakiongozwa na Chama Cha Wamiliki wa Vyombo vya Habari nchini (MOAT), MISA TAN, TMF, TAMWA, Baraza la Habari Tanzania na Jukwaa la Wahariri, wanaamini kuwa kutekwa na kuteswa kwa Mwenyekiti wa Jukwaa la Wahariri, Absalom Kibanda, kumetokanana msimamo imara wa kalamu yake. 

 Kwamba shambulio lililofanywa dhidi ya Kibanda halikutokana na kitu kingine chochote, zaidi ya kazi yake ya uandishi wa habari. Kutokana na hali hiyo, wadau wa habari wamelichukua suala hilo kuwa ni shambulizi dhidi ya uhuru wa vyombo vya habari nchini na kuwajengea hofu wahariri, waandishi na wanaharakati wote ili wasitekeleze wajibu wao kwa umma. 

 Pili, wadau wa vyombo vya habari wanaona kuwa tukio hilo ni mfululizo wa mashambulizi ya namna hiyo. 

 Kwamba katika mazingira hayo wamejiona na kutambua kuwa hakuna aliye salama. Ilianza kwa waandishi wa habari wa gazeti la MwanaHALISI, Saed Kubenea na Ndimara Tegambwage, kutekwa kwa Dk. Steven Ulimboka, kuuawa kwa mwandishi wa kituo cha Channel Ten, Daudi Mwangosi, na sasa mashambulizi dhidi ya Kibanda.

 Haya ni baadhi tu ya matukio yanayoonyesha hali ya kuzidi kuzorota kwa mazingira ya utendaji kazi wa wanahabari na wanaharakati.

 Tatu, wadau wa vyombo vya habari wamesikitishwa na hatua ya baadhi ya maofisa na watumishi wa vyombo vya usalama, kutumiwa kutekeleza vitendo vya uhalifu ambavyo vinatishia usalama wa waandishi wa habari na wananchi kwa jumla. 

 Kwa mfano, usumbufu alioupata mwandishi wa habari, Eric Kabendera na familia yake, ambapo wazazi wake walihojiwa na waliojiita watumishi wa Idara ya Uhamiaji, ulifanywa kwa shinikizo la watu wanaotumia watumishi wa umma kutekeleza matakwa yao ya kuleta hali ya kuzorota kwa usalama wa waandishi wa habari.

 Nne, tunaitaka serikali iunde tume huru ya wapelelezi kuchunguza undani wa masuala haya kwa kuwa kasi ya uchunguzi wa vyombo vya usalama hapa nchini hairidhishi na pia baadhi ya watendaji ndani ya vyombo hivyo wanahusishwa na kadhia hizi. 

 Tano, wadau wa habari wamekubaliana kuunda kamati ya watu 16 kukutana na wakuu wa vyombo vya usalama nchini, ambao ni Waziri wa Mambo ya Ndani nchini, Emmanuel Nchimbi, Mkuu wa Jeshi la Polisi, IGP Said Mwema, Mkuu wa Usalama wa Taifa, Othuman Rashid, na Naibu wake, Jack Zoka, Mkuu wa Taasisi ya Kuzuia na Kupambana na Rushwa nchini, Edward Hoseah na kuzungumzia undani wa suala hili la usalama wa makundi yanayolengwa na vitendo hivyo vya kushambuliwa, kuumizwa na hata kuuawa.

CHANZO: BOFYA