Malori 40 ya NATO yachomwa moto na wanamgambo wa Taliban Pakistan

Malori zaidi ya 40 ya shirika la kijeshi la NATO yameteketezwa kwa moto katika mashambulio mawili tofauti yaliyofanywa na kundi la Taliban ya Pakistan huku wanamgambo hao wakishadidisha operesheni hizo za mashambulio yenye lengo la kuvuruga misafara hiyo ya malori yanayoelekea nchini Afghanistan. Katika shambulio jipya lililofanywa hapo jana malori 26 ya mafuta ya vikosi vya NATO yaliyokuwa yameegeshwa, yalichomwa moto na wanamgambo wa Taliban katika eneo la Nowshera kaskazini magharibi mwa Pakistan. Shambulio la Nowshera ni la tano la aina yake kufanywa katika kipindi cha juma moja ambapo jumla ya malori 100 yameteketezwa na watu wanne kuuawa kutokana na mashambulio ya kundi la Taliban ya Pakistan. Msemaji wa kundi hilo Azam Tariq amesema watazidisha mashambulio hayo dhidi ya malori yanayopeleka bidhaa na vifaa vya kilojistiki kwa ajili ya vikosi vya NATO nchini Afghanistan ikiwa ni kulipiza kisasi kutokana na mashambulio ya anga yanayofanywa na ndege zisizo na rubani za Marekani nchini Pakistan.