WACHEZAJI SIMBA WAPEWA DARASA OMAN

Mdhamini wa Simba safari ya Oman, Rahma Al Kharusi akiongea na wachezaji wa Simba alipowatembelea jana katika kambi yao iliyo katika hoteli ya Al Madinah Holiday eneo la Ghalla mjini Muscat, Oman.
*******
Mdhamini wa Simba safari ya Oman, Rahma Al Kharusi amewataka wachezaji wa Simba kucheza kwa kujituma, kujenga umoja ndani ya timu na kuachana na majungu.
Rahma alitua jana katika kambi ya Simba iliyo katika hoteli ya Al Madinah Holiday eneo la Ghalla mjini hapa na kufanya kikao na wachezaji akiwahusia kuitumikia Simba kwa nguvu na mapenzi ya dhati.
"Fedha nyingi sana zinatoka ili kuwaandaa, lakini lazima mjue nyie ni watu muhimu sana. Angalieni msiwaumize mashabiki ambao wanawategemea.
"wakati nikiwa naishi Singida niliwahi kusikia watu wamejiua kwa sababu ya Simba, lazima mjue nyuma yenu kuna watu wengi na wanaumia sana Simba kama ikipoteza mchezo au kufanya vibaya.
"Najua kuna matatizo upande wenu, lakini kuna matatizo pia upande wa uongozi. Lazima tuyamalize na kufanya kazi kwa umoja na ushirikiano, hatuwezi kuwa timu wakati hatupendani.
"Ninamini mtafanya vizuri lakini lazima mjue umuhimu wenu na majukumu mnayotakiwa kufanya. Nimeona mkiwa hapa mlicheza kwa kujituma na inawezekana mkafanya vizuri mkiendelea hivi.
"Mniahidi kama kweli mtafanya vizuri, mimi nitawaahidi mambo mazuri yataendelea kutokea Simba kama kweli mtafanya vizuri," alisema Rahma na wachezaji Simba wakamuahidi kufanya vizuri.
Rahma ndiye atakuwa mkuu wa msafara wakati Simba ikienda kukipiga nchini Angola katika mechi yake ya kwanza ya Ligi ya Mabingwa Afrika, mwezi ujao.
(PICHA/HABARI: SALEH ALLY / CHAMPIONI/GPL, OMAN)

• KWA HABARI ZAIDI JUU YA KAMBI YA WEKUNDU WA MSIMBAZI USIKOSE KUSOMA CHAMPIONI JUMATANO KESHO