Watu 11 wameuawa Mogadishu katika mapigano kati ya vikosi vya serikali na Al- Shabab

Watu wasiopunga 11 wameuawa leo nchini Somalia katika mapigano yaliyozuka baada ya wanamgambo wa Al Shabab kushambulia kituo cha vikosi vya serikali kusini mwa mji mkuu Mogadishu. Ahmed Warsamae, afisa usalama wa serikali amesema kwamba, mapigano hayo yalianza leo asubuhi baada ya kituo chao kilichoko karibu na eneo la Hosh kushambuliwa na wanamgambo wa Al Shabab na kupelekea watu watatu kuuawa. Ameongeza kuwa, baada ya shambulizi hilo nao pia waliwashambulia vikali wanamgambo hao na kwamba watu wasiopungua 8 waliuawa katika tukio hilo. Wanamgambo wa Al Shabab wanadhibiti theluthi mbili ya ardhi ya Somalia na wamekuwa wakifanya mashambulizi na kukaribia pambizoni mwa mji mkuu Mogadishu, ulioko chini ya udhibiti wa serikali ya mpito inayoungwa mkono na nchi za Magharibi na kusaidiwa na vikosi vya kulinda amani vya Umoja wa Afrika.  Serikali ya Uganda kuwalipa fidia waliolemazwa na waasi wa LRA kabla ya uchaguzi Serikali ya Uganda itawalipa fidia watu wapatao 10,000 wa eneo la kaskazini mwa nchi hiyo waliolemazwa na waasi wa LRA, kabla ya kufanyika uchaguzi mkuu wa nchi hiyo mwakani. Richard Todwong Mshauri Maalum wa Rais Yoweri Museveni wa eneo la Kaskazini mwa Uganda amesema leo kuwa, serikali imeanza kuorodhesha kila mtu aliyelemazwa au kusababishiwa matatizo ya kimwili na waasi wa LRA, ili kutayarisha orodha ya wahanga watakaopewa fidia. Ameongeza kuwa, licha ya kuwa wananchi wote wa kaskazini mwa Uganda walipata mateso au madhara kwa njia moja au nyingine kutokana na vitendo vya waasi hao, lakini kwa sasa wanawatafuta na kuwaorodhesha wale waliopata ulemavu au aina nyinginezo za madhara ya kimwili. Mwezi Februari serikali ya Uganda pia ilianzisha mpango wa dola milioni 100 wa ukarabati ili kuhuisha tena miundo mbinu ya kiuchumi na kijamii iliyoharibiwa na vita vya ndani, kabla ya uchaguzi mkuu wa rais na bunge unaotarajiwa kufanyika mwezi Februari mwaka ujao. Waasi wa kundi la Lord's Resistance Army (LRA) linalotaka kusimamisha sheria 10 za Kikirsto nchini Uganda ni maarufu kwa kuua raia na kuwateka nyara wanawake na watoto na kuwatumia katika vitendo vya ngono, kuwatumikisha watoto vitani na kukata viungo mbalimbali vya wale wanaowakamata.