Israel kuchunguzwa na Umoja wa Mataifa

Baraza la Usalama la Umoja wa Mataifa

Baraza la Usalama la Umoja wa Mataifa limetaka kuanzishwa uchunguzi huru kufuatia shambulio kwenye meli za kibinadamu zilizokuwa njiani kupeleka misaada katika ukanda wa Gaza.

Taarifa ya Baraza la Umoja wa Mataifa imetokea baada ya mashauriano yaliyochukua usiku kucha. Takriban wanaharakati 10 waliuawa wakati wanajeshi wa Israel walipoingia ndani ya meli hizo kwenye mipaka ya kimataifa.

Taarifa hiyo imeafikiwa kati ya Uturuki na Marekani, huku Uturuki ikisisitiza laana kali dhidi ya Israel nayo Marekani ikaamua kutotoa maneno makali kwa mshirika wake huyo wa karibu.

Baraza la Usalama la Umoja wa Mataifa limelaani matukio yote yaliyosababisha vifo vya watu 10 na wengine wengi kujeruhiwa pamoja na kufariji familia za waathirika.

Aidha baraza hilo limetaka meli hizo ambazo zinazuiliwa mwambao wa Israel kuachiliwa mara moja. Punde baada ya taarifa hizo kutolewa wapiganaji kadhaa wa Kipalestina walivuka mpaka na kuingia upande wa Israel ambapo walikabiliana na wanajeshi huku wawili wakiuawa.

Kwa upande wake mwakilishi wa Israel katika Umoja wa Mataifa amesema wanajeshi wake walikuwa wakijikinga kutoka mashambulio ya wanaharakati hao.

Israel yakemewa kwa kushambulia meli za Gaza

Waandamanji wapinga hatua ya Israel kushika meli za Gaza.

Serikali ya Uturuki imelaani Israel katika mkutano wa dharura wa baraza la usalama la umoja wa mataifa kwa kushambulia meli zilizokuwa zinapeleka chakula cha msaada katika ukanda wa Gaza hapo jana.

Takriban wanaharakati tisa wa Palestina waliuawa baadhi wakiwa raia wa Uturuki, wakati Israel ilipovamia meli hizo zikiwa baharini.

Kwa mujibu wa waziri wa mambo ya nje wa nchi hiyo Ahmet Davutoglu, serikali ya Israel imefanya mauaji na ameitaka iombe radhi kwa kosa hilo, kuwachia meli hizo na kuwalipa fidia wanaharakati wa kipalestina.

Waakilishi wa Israel kwenye mkutano huo wamesema kuwa hatua ya wanajeshi wao ilikuwa ya kujilinda kutokana na tisho la uvamizi.

Wakati huo huo, waziri wa ulinzi wa Israel, Ehud Barack,ameelezea alitumai jamii ya kimataifa ingeelewa tisho la usalama inalokabiliwa nalo kutoka kwa kundi la wapiganaji la hamas.

Lakini Hamas wanasema kuwa Israel haiwezi kuendelea kudhalilisha wapalestina kwa kisingingizo cha usalama.

BBC Swahili.